Aditya uvacha 9049600622

१८ नोव्हेंबर २०११ रोजी कालभैरव जयंती आहे. कालभैरव जयंती आहे. कालभैरव हा शंकराच्या अष्टभैरवांपैकी एक देव. कालभैरवास काशीचा कोतवाल ही उपाधी आहे. पुण्यसंवर्धक अशी ही देवता त्वरीत प्रसन्न होणारी आहे, असे म्हणणे वावगे ठरणार नाही. आपल्या प्रगतीसाठी झटणा-या मानवाच्या प्रयत्नास यशाची फळे लागतीलच असे कोणी सांगू शकत नाही. मात्र प्रयत्नातील सातत्य हा मानवी स्वभाव सतत जागृत ठेवायचा असेल, तर दैवी उपासना हा सर्वोत्तम आधार ठरतो. दैवी उपासनेने मानसिक बळ प्राप्त होते,सकारात्मक विचारशक्तीचा विकास होतो, सत्कर्माची मनास प्रेरणा मिळते हे आपण नेहमीच अनुभवत असतो. आपण जर प्रयत्नपूर्वक कालभैरवाच्या उपासनेचा मार्ग स्वीकारला तर आपणास सद्वर्तनाची,महत्त्वाकांक्षेची,प्रगतीची परीसीमा गाठाल यात तिळमात्र शंका नाही. आपल्या सहज वर्तनातून परोपकाराचा मकरंद लोकमानसास मोहित करेल याची प्रचिती आल्या शिवाय राहणार नाही. आपले आजचे वर्तन कसे आहे, आपली देवी उपासनेची पार्श्वभुमि किती सुदृढ आहे या सर्व बाबी दुय्यम ठरतात. आपण ज्या क्षणी श्रीकालभैरवाच्या उपासनेचा प्रयत्न सुरु करतो, त्याच क्षणी साधकाच्या यशाचे नंदादीप प्रज्वलीत करण्यास भैरवगण उत्सुक असतात हे अनुभवसिद्ध सत्य आहे. अर्थात यासाठी उपासनेतील सातत्य मात्र महत्त्वाचे आहे. आद्य शंकराचार्यांनी रचलेले कालभैरवाष्टक स्तोत्र नित्य पठणात असणे यशोवर्धक ठरते . या स्तोत्राची फलश्रृती पुढील प्रमाणे आहे.
कालभैरवाष्टकं पठंति ये मनोहरं ज्ञानमुक्तिसाधनं विचित्रपुण्यवर्धनम् ।
शोकमोहदैन्यलोभकोपतापनाशनं प्रयांति कालभैरवांघ्रिसंनिधिं नरा ध्रुवम्॥
कालभैरवाच्या नित्य स्तोत्रपठणाने अज्ञानजन्य पापनिर्मितीची प्रक्रिया बंद होते, त्यायोगे दुर्लभ अशा मुक्तिचे साधन ठरणारे सद्वर्तन आपल्या हातुन सहजगत्या घडते व अविश्वसनीय असा पुण्यसंचय होत जातो. हे यास्तोत्र पठणाचे प्रधान वैशिष्ट्य आहे. शोक, मोह, दैन्य, लोभ, कोप, व ताप या मनोविकृतीचे मनावरील अधिराज्य कालभैरव आपल्या उग्रदृष्टीक्षेपाने भक्तोद्धारार्थ भस्मसात करतो. ध्येयसिद्धिचा स्फुल्लिंग मनात सतत जागृत ठेवण्यासाठी या स्तोत्रपठणाचा अत्युत्तम लाभ होतो हा अनुभव घ्या. ज्यांना यास्तोत्राची mp3 फाईल हवी असेल त्यांना ती विनामूल्य पाठवण्यात येईल.

विक्रमादित्य दाजी पणशीकर,
पेडणे-गोवा,
९०४९६००९२२
vnp999@gmail.com